Víetnömsk könguló í heimsókn á Eskifirði

Starfsmenn netaverkstæðis á Eskifirði voru í síðustu viku að tæma gám sem í var efni til netagerðar. Gámurinn var kominn til Eskifjarðar alla leið frá Víetnam og reyndist hann innihalda laumufarþega. Starfsmennirnir ráku augun í köngulóarvef og vefsmiðurinn reyndist sprellifandi eftir ferðalagið langa.

Enn er á huldu hverrar tegundar köngulóin er en hún býr nú í sérstakri krukku í grunnskóla staðarins og er höfð til sýnis fyrir nemendur skólans. Silja Jóhannesdóttir, leiðbeinandi við Grunnskólann á Eskifirði segir í samtali við Vísi að köngulóin sé enn við góða heilsu eftir sex daga dvöl á Eskifirði. Nemendurnir hafa reynt að gefa henni að borða en hún virðist fúlsa við því, enn sem komið er. Silja segir að þeir kennarar sem áhuga hafi á kvikindum sem þessum keppist nú við að reyna að greina hverrar tegundar köngulóin víðförla er.

Þeir sem telja sig þekkja köngulóna af myndinni eru beðnir um að hafa samband við grunnskóla Eskifjarðar.