Frestar því að gefa út tilmæli vegna FIT-kostnaðar

Gísli Tryggvason, talsmaður neytenda, hefur í bili hætt við að gefa út formleg tilmæli til banka og sparisjóða vegna svokallaðs FIT-kostnaðar og hyggst bíða niðurstöðu starfshóps sem viðskiptaráðherra skipaði til þess að fara yfir gjaldtöku bankanna.

Fram kemur á vef talsmannsins að hann fari þó til bráðabirgða fram á að bankar og sparisjóðir fari yfir skilmála sína, verklag og umsóknareyðublöð í því skyni að tryggja að neytendur séu upplýstir um viðbrögð við yfirdrætti, en FIT-kostnaður er innheimtur ef fólk fer yfir á reikningum, til dæmis debetkortareikningum.