Ólafur og Dorrit láta nágrannadeilu ekki stoppa sig

Ólafur Ragnar Grímsson forseti setur embættisskyldur sínar framar persónulegum hagsmunum. Þrátt fyrir að hann standi í hatrömmum nágrannadeilum við Þorstein Jónsson, stjórnarformann Glitnis, og reyndar fleiri út af fyrirhuguðum bílskúrs- og skjólveggjabyggingum við Laufásveg þá stoppaði það ekki hann og Dorrit Moussaieff í að vera heiðursgestir Glitnis í boði sem bankinn hélt í Rockefeller Center í New York í gærkvöld. Veislan var haldin í tilefni af því að Glitnir opnar seinna í dag útbú á Manhattan í New York.

Ólafur Ragnar og Þorsteinn hafa undanfarin ár deilt um rétt þess síðarnefnda til að reisa bílskúr við hús sitt á Laufásvegi 73. Beint á móti Þorsteini er gestahús forsetaembættisins og hefur embættið, með Ólaf Ragnar í broddi fylkingar, komið í veg fyrir að Þorsteinn gæti reist svo mikið sem einn múrstein á lóð sinni.

Skýring embættisins er sú að tignir gestir, sem þurfa mikla öryggisgæslu, dvelji í gestahúsinu og því megi ekkert gera sem getur torveldað lögreglunni að tryggja öryggi gestanna. Ríkislögreglustjóri hefur ritað greinargerð máli embættisins til stuðnings en lögmaður Þorsteins hefur á móti sakað Ríkislögreglustjóra um að falsa gögn fyrir forsetann. Lögmaðurinn heldur því fram að gestahúsið sé í slíku ástandi að enginn maður, sem er tiltölulega vandur af virðingu sinni, geti gist þar og því þurfi enga sérstaka öryggisgæslu.

Þrátt fyrir að þessi stóru orð hafi verið látin falla í grannadeilunni fór víst mjög vel á með forsetanum og stjórnarformanninum í veislunni í gærkvöld. Krytur úr grámyglu íslensks veruleika fengu að víkja fyrir hinni íslensku útrásargleði.