Action man í hremmingum á Austurlandi

Hreindýraveiðimenn úr Veiðifélaginu Sósunni rákust á Roger Johnson eða Action man í suddaveðri á leið frá Egilsstöðum til Hafnar í Hornafirði. Hann hugðist ná þar rútu til Reykjavíkur. "Roger var kaldur og blautur og alveg búinn að vera. Beiðni hans um aðstoð var vel tekið. Hjóli hans var hent upp á kerru og honum ekið til Reykjavíkur," segir Jónas Sturla Sverrisson, einn liðsmanna í Sósunni.

Roger Johnson er 65 ára gamall. Þegar hann var rúmlega tvítugur og var í þjálfun hjá sérsveit breska hersins var hann myndaður og hefur verið fyrirmynd hinnar vinsælu Action Man-dúkku. Hann hefur verið í hjólreiðatúr umhverfis Ísland undanfarna daga.

Að sögn Jónasar kvaðst Roger ekki hafa borðað nokkurn mat í tvo daga og hafði hann sofið úti upp á heiði nóttina áður. Sósan hafi því stoppað á Höfn og boðið Roger í dýrindis smálúðu á Kaffihorninu. Þar hafi Roger tekið hressilega til matar síns.

Félagsmenn Sósunnar keyrðu Roger inn á tjaldstæðið í Laugardal og bentu honum á að gista í farfuglaheimilinu í stað þess að gista í tjaldi. Hann tók vel í þær ráðleggingar.

Roger fer af landi brott á fimmtudag 6. september eftir hádegi.