Íslendingur vill gefa ókunnugum Pólverja annað nýra sitt

Íslenskur karlmaður vill gefa Pólverja annað nýra sitt en Pólverjinn fékk alvarlega sýkingu við störf sín hér á landi, sem leiddi til þess að bæði nýrun skemmdust og taka þurfti neðan af báðum fótum hans. Læknir á Landspítalanum segir þetta stórmerkileg tíðindi því þetta er í fyrsta sinn sem Íslendingur býðst til að gefa ókunnugum manni líffæri með þessum hætti.

Íslendingurinn, sem er búsettur í litlu samfélagi úti á landi vill ekki láta nafn síns getið, en eftir að hann sá frétt um aðstæður Pólverjans Irek Gluchowksi á Stöð 2 í gær setti hann sig í samband við fréttastofuna og Runólf Pálsson, yfirlækni nýrnalækninga á Landspítalanum. Í samtali þeirra lýsti hann yfir vilja sínum til að gefa annað nýra sitt.

Runólfur segir að málefni Pólverjans Ireks sé í hefðbundnum farvegi en hann hlaut alvarlegan skaða vegna blóðeitrunar fyrir tveimur árum. Hann sýktist eftir vinnu við hreinsun á sorpgámi. Tekið var að báðum fótum hans fyrir neðan hné en hann missti einnig alla heyrn á öðru eyranu og hann hefur slæma heyrn á hinu.

Irek þarf að fara í nýrnavél á Landspítalanum þrisvar í viku og líf hans er allt úr skorðum sökum þess. Hann er upp í fjóra tíma í nýrnavélinni í hvert sinn.

Íslendingurinn segist vilja gefa nýrað til að hjálpa Irek því aðstæður hans séu ömurlegar og að allar líkur séu á því að þeir geti báðir lifað góðu lífi með eitt heilbrigt nýra hvor.

Magnús Böðvarsson nýrnasérfræðingur á Landspítalanum segir að hér sé um sögulegt atvik að ræða en svipuð tilvik hafi komið upp í nágrannalöndum okkar og í Bandaríkjunum. Það sé nýtt að maður stígi fram hérlendis og vilja gefa algerlega ókunnugum einstaklingi líffæri með þessum hætti.

Aðgerðir þar sem nýru eru flutt úr lifandi gjöfum yfir í sjúklinga eru framkvæmdar hér á landi. Þær krefjast mikillar undirbúningsvinnu sem snýst ekki síst um að undirbúa líffæragjafann og tryggja að hans áhætta sé í algjöru lágmarki. Jafnframt er honum gerð grein fyrir þeim afleiðingum sem líffæragjöfin kann að hafa.

Magnús segir að það sé langt ferli framundan sem skeri úr um hvort Íslendingnum sé unnt að gefa Irek annað nýrað sitt en líkur á að það gangi séu meir en þær voru áður með tilkomu nýrra og betri lyfja.