Skila áliti um samruna REI og Geysis Green Energy fljótlega

Svandísarnefndin svokallaða skilar inn áliti sínu á samruna Rei og Geysis Green Energy á næstu vikum. Þá verður tekin ákvörðun um það hvort Reykjavíkurborg fer fram á ógildingu á samrunanum eða ekki.

Nefndinni er ætlað að fara yfir ákvarðanirnar sem teknar voru á eigendafundi Orkuveitunnar. Svandís Svavarsdóttir sem stýrir rannsókninni sagði í samtali við fréttastofu í dag að gætt hafi misskilnings varðandi störf nefndarinnar í fjölmiðlum og víðar. Það gefi augaleið að nefndin verði að hafa hraðar hendur nú þegar fyrirtækið er komið á fleygiferð og það er að gera samninga erlendis með fulltingi iðnaðarráðherra.

Misskilningurin sé tilkominn af því að nefndinni sé einnig ætlað að marka stefnu Orkuveitunnar til framtíðar og þeirri stefnu eigi hún að skila í júní á næsta ári. Svandís segir að freistað verði þess að ná niðurstöðu í málinu á allra næstu vikum og þá verði tekin ákvörðun um hvort samrunanuð verði unað eða ekki.