Velti bílnum og hvarf í burtu

Björgunarsveitir í uppsveitum Árnessýslu voru kallaðar út um klukkan hálf sex í morgun eftir að bifreið fannst í skurði skammt sunnan við Stóru Laxá.

Ummerki bentu til þess að bifreiðin hafi farið nokkrar veltur út af Skeiða- og Hrunamannavegi áður en hún lenti í skurðinum. Ökumaður var hins vegar hvergi sjáanlegur og leit út fyrir að hann hafi farið fótgangandi í burtu.

Lögreglan á Selfossi lýsti eftir manninum en óttast var að hann væri alvarlega slasaður. Það var síðan um klukkan níu morgun að maðurinn kom í leitirnar. Var hann þá kominn til Reykjavíkur heill á húfi.