Rætt um að einkavæða sundlaugarrekstur í Kópavogi

Íþrótta- og tómstundaráð Kópavogsbæjar hefur nú til umfjöllunar erindi frá fyrirtækinu Rækt ehf, um að það taki að sér rekstur Sundlaugar Kópavogs. Í samtali við Vísi segir Gunnar Birgisson bæjarstjóri að sér lítist bara vel á hugmyndina við fyrstu sýn þó hann hafi ekki kynnt sér hana til hlítar.

„Almennt séð tel ég ágætt að blanda saman einkarekstri og opinberum, en ég er ekki búinn að setja mig almennilega inn í þetta einstaka mál og bíð eftir að Íþrótta- og tómstundaráð ljúki sinni vinnu," segir Gunnar. Að sögn hans má búast við því að ráðið skili af sér í næsta mánuði og þá komi í ljós hvort málið fari lengra.

Hugmyndin var rædd í gærkvöldi á fundi bæjarstjórnar og í kjölfarið sendi Samfylkingin frá sér tilkynningu þar sem vinnubrögðin í málinu eru gagnrýnd. „Við höfum furðað okkur á þessum vinnubrögðum og gagnrýnt þau. Málflutningur okkar hefur verið skýr og settum við hann fram í eftirfarandi bókun á síðasta fundi: "Það getur ekki talist eðlilegt að svo viðamiklar breytingar á rekstri þjónustustofnunar bæjarins vinnist með þessum hætti. Ákvörðun um slíkt á að taka í bæjarstjórn eftir ítarlega úttekt og umsagnir fagaðila auk grundaðrar umræðu til þess kjörinna fulltrúa um þá stefnubreytingu, sem í þessu felst. Þótt vissulega megi færa fyrir því rök að hugsanleg tækifæri felist í að fela einkaaðila rekstur Sundlaugar Kópavogs teljum við umræðu um slíkt ekki tímabæra, segir Samfylkingin.

Þau benda einnig á að bráðlega ljúki framkvæmdum við sundlaugina og þá sé viðbúið að aðsókn að lauginni muni aukast. Því sé ekki tímabært að meta rekstrarforsendur sem stendur. „Ekkert gefur tilefni til að breyta rekstrarfyrirkomulagi Sundlaugar Kópavogs og eðlilegt að reksturinn sé áfram á hendi bæjarins," segir að lokum.