MK hlýtur viðurkenningu Jafnréttisráðs

Menntaskólinn í Kópavogi hlaut í dag jafnréttisviðurkenninguna fyrir árið 2007. Hún var afhent við hátíðlega athöfn á Nordica-hóteli í dag.

Fram kemur á vef félagsmálaráðuneytisins að Menntaskólinn í Kópavogi hafi skýra og virka jafnréttisstefnu gagnvart bæði nemendum og starfsfólki skólans. Markmið jafnréttisáætlunar skólans sé að stuðla að jafnri stöðu kvenna og karla innan skólans og jöfnum tækifærum einstaklinga á sem flestum sviðum, óháð kynferði. Þetta eigi meðal annars við um rétt til starfa, aðstöðu, menntunar og launa fyrir jafnverðmæt og sambærileg störf. Enn fremur séu hlutföll kynjanna jöfn á flestum sviðum skólans, hvort sem það er í hópi stjórnenda, annars starfsfólks eða meðal nemenda.

Þá er bent á að menntaskólinn hafi tekið þátt í samevrópsku verkefni þar sem leitast er við að gera nemendur meðvitaða um kyn og kynímyndir, hvernig þær mótast og þeim viðhaldið. Þá hefur skólinn staðið fyrir sérstakri jafnréttisviku í mars síðastliðnum þar sem að kennslan hafði jafnrétti kynjanna að inntaki með einum eða öðrum hætti auk metnaðarfullrar dagskrár þar sem fjallað var um jafnrétti kynjanna frá ýmsum sjónarhornum.

„Jafnréttisráð telur að Menntaskólinn í Kópavogi sýni gott starf á sviði jafnréttismála og vill með viðurkenningunni hvetja aðra skóla til líkrar starfsemi," segir á vef félagsmálaráðuneytisins.

Það var Jóhanna Sigurðardóttir félagsmálaráðherra sem veitti skólanum viðurkenninguna.