Össur fann brunalykt í Kalíforníu

„Þetta var rétt fyrir lok vinnudags og fólk hvort sem er á leiðinni heim," segir Karl Guðmundsson starfsmaður Össurar í Foothill Ranch í Kalíforníu. Skrifstofa stoðtækjafyrirtækisins var rýmd í fyrradag vegna skógareldanna en engin hætta var á ferðum að sögn Karls.

„Það var enginn reykur inni í byggingunni en það er brunalykt yfir öllu svæðinu. Þetta var ekkert að beiðni yfirvalda eða neitt svoleiðis."

Edda Geirsdóttir hjá Össuri á Íslandi segir umferðina vera mikla á svæðinu og því hafi verið ákveðið að leyfa fólkinu að fara heim.

Stoðtækjaframleiðandinn er með þrjár skrifstofur á svæðinu en sú sem Karl er hjá er næst upptökum skógareldanna.

„Við sjáum þetta úr fjarska en fólk hérna er voðalega rólegt yfir þessu. Krakkarnir fóru í leikskólann í morgun og lífið gengur sinn vanagang. Fólk er samt ekkert mikið á ferðinni þar sem það eru rykagnir og brunalykt í loftinu," segir Karl að lokum.