Stimpil- og vörugjöld burt á næstu mánuðum

Stimpil- vörugjöld verða lögð niður á næstu mánuðum og lagafrumvarp um greiðsluaðlögun lagt fram á yfirstandandi þingi að sögn Björgvins G. Sigurðssonar viðskiptaráðherra sem í morgun kynnti heildarstefnumótun á sviði neytendamála sem hann hyggst hrinda af stað.

Viðskiptaráðherra hefur þegar falið Félagsvísindastofnun, Hagfræðistofnun og Lagastofnun Háskóla Íslands að vinna ítarlega rannsókn á stöðu neytendamála hér á landi.

Meðal markmiða stefnumótunarinnar er að vinna gegn háu verðlagi á Íslandi, auðvelda almenningi að takast á við breytta heimilis- og verslunarhætti og styrkja og auka vitund neytenda um rétt sinn. Þá á að innleiða í auknum mæli upplýsingatækni í þágu neytenda og styðja þá til að taka virkari þátt til að sinna hagsmunum sínum á markaði.

Fram kemur í tilkynningu frá viðskiptaráðuneytinu að íslenskir neytendur eigi rétt á að fá vöru og þjónustu á sambærilegu verði og neytendur í nágrannalöndunum. Ráðuneytið muni markvisst leita leiða til að því markmiði verði náð og skorar á íslenska neytendur til samstarfs um það. Í því augnamiði á einnig að styrkja Samkeppniseftirlitið, neytendastofnanir og auka framlag til Neytendasamtakanna.

Enn fremur á að draga úr margvíslegum innflutningshömlum, svo sem vörugjöldum og tollum. Enn fremur hyggst ráðherra leggja fram frumvarp um breytingu á lögum um eftirlit með óréttmætum viðskiptaháttum og gagnsæi markaðarins.

Komið í veg fyrir sjálftöku bankanna

Þá verður flutt frumvarp um greiðsluaðlögun á yfirstandandi þingi til þess að hjálpa fólki sem lendir í efnahagsáföllum, t.d. vegna slysa eða veikinda, að koma undir sig fótunum á ný.

Þá segir í tilkynningunni að tryggja þurfi að sjálftaka í gjaldtöku fjármálastofnana, s.s. með seðilgjöldum eða vanskilagjöldum, eigi sér ekki stað. Efla þurfi samkeppni um þjónustu á þessu sviði til hagsbóta fyrir heimilin í landinu.