Afli erlendra ríkja minnkar um helming á milli ára

Afli erlendra ríkja við Ísland minnkaði um rúman helming á milli áranna 2005 og 2006 samkvæmt nýrri skýrslu Hagstofunnar.

Þar kemur fram að aflinn hafi verðið 114 þúsund tonn árið 2005 í rúmlega 54 þúsund tonn árið 2006. Uppistaða aflans var sem fyrr loðna. Færeyingar veiddu mest erlendra þjóða hér við land 2006 en Norðmenn árið 2005. Afli erlendra skipa sveiflast töluvert á milli ára. Hann var til að mynda minnstur árið 1993 eða níu þúsund tonn en mestur árið 2002, 148 þúsund tonn.

Fram kemur í skýrslu Hagstofunnar að afli alls heimsins hafi numið 93 milljónum tonna árið 2005 og minnkaði hann um rúm milljón tonn frá árinu 2004. Kyrrahafið gaf mestan afla og stærsta einstaka fisktegundin var Perúansjósa en hún veiddist í rúmum tíu milljónum tonna. Á eftir ansjósunni var mest veitt af Alaskaufsa, 2,8 milljónir tonna,og síld var í þriðja sæti en af henni veiddust 2,3 milljónir tonna.

Kínverjar veiddu mest allra þjóða árið 2005 en Íslendingar voru í 14. sæti heimslistans, í öðru sæti fiskveiðiþjóða á Norðaustur-Atlantshafi og í 8. sæti veiðiþjóða á Norðvestur-Atlantshafi.