Aron Pálmi hitti Wesley Snipes á Vegamótum

„Já ég hitti hann um helgina, hann var með vinum sínum og fjölskyldu," segir Aron Pálmi Ágústsson um stórleikarann Wesley Snipes sem hann hitti á skemmtistaðnum Vegamót, um helgina.

Að sögn Arons var leikarinn með um fimmtán manns með sér og ræddu þeir saman í um fimmtán mínútur. „Hann sat nú eiginlega allan tímann úti í horni og keypti risa stóra bjóra" segir Aron sem fékk ekki bjór hjá stórleikaranum þar sem Aron var á bíl.

Stórleikarinn var þarna um tvö leytið að sögn Arons en öll hersingin fór á sama tíma. „Hann sagðist bara vera að stoppa stutt hérna vegna þess að honum langaði að kíkja aðeins á næturlífið."

Aðspurður hvort hann sé viss um að þarna hafi Wesley Snipes verið á ferð segir hann. „Hann sagði svo og barþjónninn líka." Aron segist því ekki hafa neina ástæðu til þess að efast um að þarna hafi stórleikarinn verið á ferð.

Hann segist ekkert sérstakur aðdáandi leikarans en það hafi verið gaman að hitta hann. „Hann er góður leikari og mín uppáhalds mynd er líklega Blade."

Félagarnir ræddu saman í um fimmtán mínútur eins og fyrr segir og ræddu þeir mikið um Ísland. „Hann vissi nú ekki mikið um landið en hann var forvitinn um veðrið og skemmtanalífið."

Aron er að gefa út bókina Enginn má sjá mig gráta nú fyrir jólin og segir hana ganga vel. „Ég er mjög ánægður með bókina og þetta var eitthvað sem ég þurfti að gera. Margir af þeim sem ég kynntist í fangelsinu notuðu fíkniefni til þess að komast yfir þetta. Sumir frömdu jafnvel sjálfsvíg. Ég varð því að finna aðra leið og það er auðveldara fyrir mig að koma þessu frá mér í gegnum tölvuna. Þessi bók hjálpaði mér því mjög mikið," segir Aron Pálmi að lokum.