Gaf Landspítalanum fimm milljónir til tækjakaupa

Forsvarsmenn Eignarhaldsfélagsins Brunabótafélags Íslands afhentu í morgun forstjóra Landspítalans fimm milljónir króna að gjöf til þess að kaupa tæki sem tengjast meðferð alvarlegra brunaáverka á börnum.

Þetta var gert í tilefni af 90 ára afmæli Brunabótafélagsins. Fram kemur í tilkynningu að þegar hafi verið ákveðið að kaupa tiltekin tæki fyrir peningana til að nota á svæfingar-, gjörgæslu- og skurðdeildum Landspítala. Slík tæki eru ekki til þar nú.

Haft er eftir Guðmundi Bjarnasyni, stjórnarformanni Brunabótafélagsins, að gjöfin sé viðurkenning og þakklætisvottur fyrir gott starf Landspítalans. Stuðningurinn sé auk þess í anda þeirrar stefnu félagsins að sinna forvarnarverkefnum tengdum upphaflegri starfsemi Brunabótafélagsins.

Brunabótafélagið var stofnað árið 1917 og var ætlað að taka að sér brunatryggingar á húseignum utan Reykjavíkur. Það hætti hins vegar vátryggingastarfsemi árið 1994 og varð eignarhaldsfélag og voru hlutir félagsins í VÍS og Lífís seldir. Segir í tilkynningunni að félagið fylgi varkárri fjárfestingarstefnu og ávaxti eignir sínar aðallega í innlendum hlutabréfum og skuldabréfasjóðum en einnig í erlendum hlutabréfum.