FÁR: Leggst gegn áfengisfrumvarpinu

Félag áfengis- og vímuefnaráðgjafa, (FÁR), hefur sent ályktun á alla alþingismenn þar sem þeir eru hvattir til þess að leggjast gegn frumvarpi sem heimilar sölu áfengis í matvöruverslunum. Magnús Einarsson, ritari FÁR, segir að þar á bæ séu menn vongóðir um að þinmenn átti sig á alvarleika málsins og þeim afleiðingum sem sala léttvíns og bjórs í matvöru búðum myndi hafa í för með sér.

Magnús segir að það hafi margoft sýnt sig að sú forvörn sem felst í því að hefta aðgengi að áfengi sé ódýrasta og virkasta aðferðin sem um getur og því sé varhugavert að breyta. Að mati félagsfundar FÁR vinnur umrætt frumvarp gegn þessum markmiðum Heilbrigðisáætlunarinnar."

Ályktunina í heild sinni má lesa hér fyrir neðan.

„Félag áfengis- og vímuefnaráðgjafa (FÁR) leggst eindregið gegn fumvarpi til laga um sölu áfengis í matvöruverslunum og skorar á alþingismenn að standa vörð um markmið áfengislaga, sem er að vinna gegn misnotkun áfengis og greiða því atkvæði gegn frumvarpinu.

 

Áfengisvandinn er vaxandi heilbrigðisvandamál hér á landi samhliða mikilli aukningu á neyslu áfengis. Í kjölfarið siglir svo vandi vegna annarra löglegra og ólöglegra vímuefna. Kostnaður samfélagsins af áfengisneyslu er verulegur. Í gögnum frá Lýðheilsustöð kemur fram að áætlaður heildarkostnaður þjóða af völdum áfengisneyslu sé á bilinu 1-3% af þjóðarframleiðslu og ætla má að þessi kostnaður sé ekki undir 30 milljörðum á Íslandi. Þá er ótalinn sá tilfinningalegi skaði sem ofneysla áfengis veldur þeim sem glíma við áfengisvanda, börnum þeirra og öðrum aðstandendum.

 

Á Íslandi hefur um langt árabil verið athugað markvisst af forvarnarfulltrúanum í Hafnarfirði, hvort unglingar undir aldri fái keypt tóbak í verslunum. Niðurstöður þeirra athugana benda til þess að um þriðjungur ungmenna sem ekki eiga að fá keypt tóbak geti verslað það í búðum hér. Bandarísk rannsókn hefur leitt í ljós að auðveldara er fyrir fólk undir lögaldri að fá keypt áfengi í matvöruverslunum og stórmörkuðum en sérstökum áfengisverslunum. Ætla má að svipað verði uppi á teningnum hér.

 

Rannsóknir hafa sýnt að samband er á milli aðgengis að áfengi og neyslu, þannig að aukið aðgengi eykur neyslu. Ennfremur er ljóst að aukinni neyslu fylgir aukinn vandi. Áfengi hefur neikvæð áhrif á fjölda sjúkdóma, er oft orsakaþáttur í slysum og getur haft veruleg neikvæð samfélagsleg áhrif. Áfengisneysla á meðgöngu hefur skaðleg áhrif á þroska barnsins og síðar á fullorðinsárum.

 

Í Heilbrigðisáætlun til ársins 2010, sem samþykkt var samhljóða á Alþingi þann 20. maí 2001, eru áfengis-, vímuefna- og tóbaksvarnir settar fram sem fyrsta markmið. Þar eru sett fram markmið um að minnka heildarneyslu áfengis hér á landi og ekki síður að vinna gegn neyslu ungs fólks. Að mati félagsfundar FÁR vinnur umrætt frumvarp gegn þessum markmiðum Heilbrigðisáætlunarinnar."

 

Ályktunin var samþykkt á almennum félagsfundi

Félags áfengis- og vímuefnaráðgjafa þann 22. nóvember 2007.