Kæra vörusvik á ginsengi til Neytendastofu

Neytendasamtökin hafa kært til Neytendastofu vörusvik við sölu á ginsengi. Eftir því sem segir á vef Neytendasamtakanna er um að ræða rautt ginseng sem ekki hefur haft þá virkni sem ætla mætti.

Varan er í umbúðum merktum fyrirtækinu Fæði fyrir alla. Eftir kvartanir, þar sem bent var á að um væri að ræða hvítt ginseng en ekki rautt, ákváðu Neytendasamtökin að senda vöruna út til rannsóknar í Þýskalandi. Sú rannsókn leiddi í ljós að um hvítt ginseng væri að ræða.

Því leituðu samtökin til Neytendastofu og báðu hana um að banna dreifendum vörunnar að markaðssetja eða merkja hana sem rautt ginseng. „Þess er jafnframt óskað að Neytendastofa hraði aðgerðum sínum enda óþolandi að verið sé að selja neytendum svikna vöru," segir á vef Neytendasamtakanna.