Bingó meira fjárhættuspil en pókermót

Þór Bæring Ólafsson, rekstrarfræðingur og pókerspilari, segir að mótapóker sé löglegur og ekki fjárhættuspil. Hann undrast æsifréttamennsku af slíkri tómstundaiðju sem hann segir að hafi verið stunduð undanfarin sólarhring.

Fréttastofa Ríkissjónvarpsins greindi frá því í gær að hægt væri að spila póker á hverju kvöldi gegn greiðslu gjalds og sigurvegarar hafi grætt allt að 70 þúsund krónur á slíkum mótum. Þá greindi Vísir frá því að hundruðir milljóna velti á milli handanna á íslenskum pókerspilurum á ári hverju.

„Mótapóker er í sjálfu sér ekkert ólíkur bridgespili. Fólk greiðir í flestum tilfellum þrjú til fjögur þúsund krónur fyrir að fá að taka þátt og getur síðan unnið einhvern pott," segir Þór Bæring. „Í raun er bingó meira fjárhættuspil en mótapóker," bætir hann við. Hann bendir á að pókerspil og bridge velti á hæfileikum spilarans en bingó bara á heppni.

Þór Bæring segir að þær upphæðir sem hafi verið nefndar í samhengi við pókermót séu furðulegar. „Enginn sem ég þekki kannast við þessar tölur, að það sé spilað með tugi þúsunda eða jafnvel milljónir króna," segir hann. Hann segir alls ekki hægt að leggja svokallað moneygame, þar sem lagðar eru fúlgur fjár að veði, til jafns við mótapóker.