Vonast til þess að geta lagt fram orkumálafrumvarp fyrir jól

Össur Skarphéðinsson iðnaðarráðherra segist vonast til að geta lagt fram frumvarp um orkumál fyrir jólahlé þingsins en á ekki von á því að það verði afgreitt fyrir jól.

Fram hefur komið í fjölmiðlum að Dagur B. Eggertsson borgarstjóri hafi óskað eftir því að ríkið, sveitarfélögin og meðeigendur þeirra í Hitaveitu Suðurnesja ræði saman um framtíð fyrirtækisins í því skyni að tryggja að auðlindir og almenningsveitur verði í eigu almennings. Sendi Dagur bréf til þessara aðila í síðustu viku og óskaði eftir viðræðum.

Árni Sigfússon, bæjarstjóri í Reykjanesbæ, sagði í fréttum Ríkisútvarpsins í gær að engar ákvarðanir um framtíð Hitaveitunnar yrðu teknar fyrr en frumvarp iðnaðarráðherra um skipan orkumála hefði verið samþykkt.

Össur Skarphéðinsson iðnaðarráðherra sagði í samtali við Vísi í morgun að iðnaðarráðuneytið stefndi að því að sýna umrætt frumvarp fyrir jólahlé. Hann segir um flókið mál að ræða og að skoða verði það meðal annars með tilliti til stjórnarskrárinnar og reglna á Evrópska efnahagssvæðinu. Menn í iðnaðarráðuneytinu vildu hafa allt á hreinu áður en frumvarpið yrði lagt fram.

Aðspurður sagðist hann ekki telja að frumvarpið yrði afgreitt fyrir jól. Hann reiknaði með að skiptar skoðanir yrðu um málið og mikilvægt væri að ræða það vel áður en það yrði að lögum.