Segir íslenskar eftirlitsstofnanir óvirkar

Guðmundur Gunnarsson formaður Rafiðnaðarsambandsins sagði í Silfri Egils í dag að íslenskar eftirlitsstofnanir hefðu ekki gengt hlutverki sínu varðandi erlenda verkamenn á Kárahnjúkum. Guðmundur sem er í stjórn Evrópusambands byggingarmanna sagði afar slæmt orð fara af aðbúnaði erlendra verkamanna hér á landi í Evrópu. Hann sagðist ekki stoltur af umræðu í erlendum fjölmiðlum flótta 600 Portúgala sem neita að koma hingað til lands aftur eftir illa meðferð fyrsta árið á Kárahnjúkum.

Árni Páll Árnason þingmaður Samfylkingar sagði í þættinum engu líkara en íslensk stjórnvöld hefðu samið við glæpafyrirtæki sem hefði kerfisbundið brotið íslenskt lög. Arðsemi verkefnisins hafi verið í járnum og forsenda þess að fara út í framkvæmdina hefði verið að velja ódýrasta aðilann. Hann sagði undanbrögð og svik hafa einnkennt hvert fótmál Impregilo út alla verkframkvæmdina. Þess vegna þurfi að endurskoða útboðsferlið.

Deilt var á Landsvirkjun fyrir að gefa fyrirtækjunum leyfi til að hefja verkefnin án þess að búið væri að reisa vinnubúðir fyrir fólkið. Aðbúnaður hafi verið afar slæmur og sumir búið í gámum.

Guðmundur ítrekaði að vandinn lægji hjá fyrirtækjunum. Verkamennirnir væru fengnir til landsins, þeim borgaðir unglingataxtar og síðan seldir út. Dæmi væru um að einn daginn væru þeir seldir út sem rafvirkjar, þann næsta sem pípararar og þriðja daginn sem flísalagningarmenn. Þannig væri íslensk vinnulöggjöf þverbrotin og fyrirtækin komist upp með það.