Missti stjórn og valt á Grindavíkurvegi

Ökumaður, sem grunaður er um ölvun við akstur, missti stjórn á bíl sínum á Grindavíkurvegi í nótt með þeim afleiðingum að bifreiðin valt á veginum. Ökumaðurinn slapp án teljandi meiðsla og gistir nú fangageymslu.

Þá var annar ökumaður, grunaður um ölvun, stöðvaður í Reykjanesbæ í nótt en sá brást skjótt við og reyndi að komast undan lögreglu á hlaupum. Ekki var hann þó frárri á fæti en svo að lögreglan hljóp hann uppi og handsamaði. Hann gistir nú einnig fangageymslu.

Annars var að mestu rólegt hjá lögreglu um landið. Ein minniháttar líkamsárás varð við Prikið á Laugavegi þegar maður var sleginn í höfuðið með glasi. Hann skarst nokkuð og bólgnaði og var fluttur með sjúkrabifreið á slysadeild. Þá voru sex handteknir fyrir brot á lögreglusamþykkt og átta gistu fangageymslur vegna ölvunar og ölvunaraksturs.