Flugi JetX frestað vegna beyglu á búk

Fresta varð flugi flugvélar JetX flugfélagsins, sem flýgur fyrir Heimsferðir, frá Halifax í nótt vegna beyglu sem uppgötvaðist á búki vélarinnar. Hún var að koma frá Kúbu með millilendingu í Halifax í Kanada á leið heim til Íslands. Í Halifax urðu menn varir við beygluna, sem mun samkvæmt heimildum fréttastofunnar vera á afturhluta vélarinnar. Allt bendir til að ekið hafi verið utan í flugvélina á flugvellinum á Kúbu.

Farþegi í flugvélinni segir að ferðin frá Kúbu hafi gengið eðlilega fyrir sig og ekkert amað að 182 farþegum um borð. Talsmaður flugfélagsins tilkynnti farþegum að viðgerð tæki að minnsta kosti tíu klukkustundir og var þeim öllum komið fyrir á hóteli.

Flugvélin átti að lenda í Keflavík klukkan 7:20 í morgun, en ljóst er að hún kemur ekki hingað fyrr en í fyrsta lagi seint í kvöld.