Það er dýrt að fyll´ann

25 ára gamall karlmaður var dæmdur í Héraðsdómi í tveggja mánaða fangelsi fyrir að dæla bensíni á bíl sinn og aka á brott án þess að borga.

Maðurinn játaði fyrir dómi brot sitt en hann dældi á bensínstöð Olís fyrir 6.261 krónu í apríl á þessu ári. Maðurinn á að baki nokkurn sakaferil en Olíufélag Íslands fór fram á skaðabætur að andvirði 6.261 krónur.

Maðurinn þarf að greiða þá upphæð og fékk þar að auki tveggja mánaða fangelsis dóm.

Hinsvegar er tekið fram í dómnum að fresta skuli fullnustu refsingar og hún falli niður að tveimur árum liðnum haldi hann skilorð.