Starfsmaður Ríkiskaupa segir rangt eftir sér haft

Ríkisskaup hafa sent frá sér tilkynningu vegna forsíðufréttar DV í dag þar sem segir að stofnunin telji að hún hefði átt að sjá um sölu á íbúðum á Keflavíkurflugvelli. Í tilkynningunni segir að starfsmaðurinn sem vitnað er í í fréttinni telji rangt eftir sér haft í greininni í veigamiklum atriðum.

„Aðspurður greindi hann (starfsmaður Ríkiskaupa innsk. Vísis) fréttamanni frá því að í gildi væri reglugerð um ráðstöfun eigna ríkisins nr. 206/2003," segir í tilkynningunni. Þegar hann hafi verið spurður hvort umræddar eignir hafi verið í sölumeðferð hjá Ríkiskaupum sagði hann að svo hafi ekki verið. „Ummæli um að hann undraðist að eignirnar hafi ekki verið í sölumeðferð kannast hann ekki við og eins fullyrðingar um að hann hafi talið að eignirnar eigi að seljast hjá Ríkiskaupum telur hann ekki rétt hafðar eftir sér."

Þá segir að viðkomandi starfsmaður, sem er fulltrúi á eignasölusviði Ríkiskaupa, hafi vísað að öðru leiti til fjármálaráðuneytisins sem eignasölumál ríkisins heyra undir. „Benda má á í þessu sambandi að í framangreindri reglugerð kemur m.a. fram í 9. gr. að fjármálaráðherra geti við sérstakar aðstæður veitt heimild til að víkja frá ákvæðum reglugerðar þessarar varðandi framkvæmd sölu eigna ríkisins. Ýmis sjónarmið, lög og reglur um meðferð eigna ríkisins koma til álita þegar selja á eignir ríkisins þannig að líta þarf til heildarmyndar laga og reglna og ekki grípa eina ákveðna reglugerð og alhæfa eftir henni."

„Ríkiskaup átelja þann fréttaflutning sem viðhafður var í þessu tilviki og að fréttamaðurinn hefði átt að leita til viðkomandi yfirmanna og viðkomandi ráðuneytis."