Farið fram á gæsluvarðhald í hnífstungumáli

Lögreglustjórinn á Selfossi óskaði eftir því við Héraðsdóm Suðurlands að maður sem grunaður er um að hafa stungið annan mann með hníf við Hellisheiðarvirkjun um helgina verði úrskurðaður í gæsluvarðhald til næstkomandi mánudags. Dómari hefur tekið sér frest til hádegis á morgun til að ákvarða hvort hann verði við ósk lögreglu.

Alls voru fimm manns færðir í fangageymslur lögreglunnar vegna málsins, þar á meðal þolandinn en ekki reyndist unnt að taka skýrslu af honum í gær vegna ölvunar. Fram kemur á fréttavef lögreglunnar að einn maður hafi verið látinn laus og tveir aðrir sem voru með þeim grunaða verða yfirheyrðir í dag. Enn á eftir að yfirheyra þann sem varð fyrir árásinni.

Árásin átti sér stað í vinnubúðum við Hellisheiðarvirkjun þar sem á milli 40 og 50 menn voru saman komnir að horfa á knattspyrnuleik í sjónvarpi. Ekki er ljóst enn hvort hnífsstungan átti sér stað inni í húsinu eða fyrir utan það. Segir lögregla ljóst að mikil vinna sé framundan við að ræða við alla þá sem í húsinu voru í umrætt sinn.