Vilja fjármuni til þess að rétta halla Landspítalans

Meirihluti fjárlaganefndar leggur til að Landspítalinn fái 1,8 milljarða króna fjárveitingu á fjáraukalögum þess árs til þess að rétta við uppsafnaðan rekstrarhalla spítalans. Þetta kemur fram í nefndarálit meirihlutans.

Þar er bent á að launakostnaður spítalans hafi aukist verulega umfram áætlanir og það megi fyrst og fremst rekja til ýmissa ráðstafana til að bregðast við manneklu, svo sem með yfirvinnugreiðslum, aukavöktum og verktöku.

Þá er lagt til að nærri 490 milljónir króna vegna byggingar á nýrri Grímseyjarferju verði millifærðar af liðnum Framkvæmdir hjá Vegagerðinni til liðarins Styrkir til ferja og sérleyfishafa. Er þetta gert í samræmi við sameiginlega yfirlýsingu fjármálaráðherra og ríkisendurskoðanda.

Afnotagjöld hækkuð í desember

Þá er í nefndaráliti meirihluta fjárlaganefndar lagt til að fjárheimild vegna afnotagjalda til Ríkisútvarpsins verði hækkuð um 10 milljónir króna þar sem áformað er að hækka afnotagjöldin um 4 prósent frá og með 1. desember næstkomandi. Reiknað er með að hækkunin auki tekjur hlutafélagsins um 109 milljónir króna á ársgrundvelli.

Alls gerir meirihluti fjárlaganefndar 53 breytingartillögur við frumvarp til fjáraukalaga og hækkar það um nærri fimm milljarða króna. Er það álit nefndarinnar að á milli 2. og 3. umræðu þurfi að skoða sérstaklega framhaldsskóla almennt, rekstrarkostnað sýslumannsembætta, heilbrigðisstofnanir og hjúkrunarheimili og gera tillögu um skiptingu fjárheimildar á einstakar stofnanir. Enn fremur mun nefndin skoða á milli umræðna málefni er varða eignir á fyrrum varnarsvæði við Keflavíkurflugvöll.