Nefnd fer yfir lög um skráningu hlutabréfa í erlendri mynt

Björgvin G. Sigurðsson viðskiptaráðherra hefur ákveðið að skipa nefnd sem fara á yfir málefni fyrirtækja sem skráð eru hér á landi en skrá hlutabréf sín í erlendri mynt.

Fram kemur í tilkynningu frá viðskiptaráðuneytinu að áhugi fyrirtækja, sem skráð eru á verðbréfamarkaði hér landi, fyrir því að skrá hlutafé sitt í erlendri mynt hafi aukist verulega. Því hafi spunnist umræður um hvernig standa skuli að greiðsluuppgjöri vegna viðskipta með slík bréf.

Ráðherra hefur því skipað nefnd sem á að fara yfir lög sem lúta að uppgjöri innlends hlutafjár sem skráð er í erlendri mynt. Formaður nefndarinnar verður Jón Sigurðsson, fyrrverandi bankastjóri Norræna fjárfestingarbankans, og á nefndin að skila niðurstöðum fyrir 1. mars á næsta ári.