Kannar hvort setja þurfi reglur um sölu á erfðamengi

Guðlaugur Þór Þórðarson heilbrigðisráðherra hyggst kanna hvort setja eigi sérstakar reglur um sölu á erfðamengi til einstaklinga. Þettta kom fram í svari hans við fyrirspurn Ástu Ragnheiðar Jóhannesdóttur, þingmanns Samfylkingarinnar, á Alþingi í dag.

Ásta gerði nýja þjónustu Íslenskrar erfðagreiningar að umtalsefni sínu. Fyrirtækið býður nú einstaklingum að vinna upplýsingar úr erfðamengi þeirra með tilliti til sjúkdóma eins og sykursýki og fótaeirðar.

Sagði Ásta engar reglur til um sölu slíkra upplýsinga og spurði ráðherra hvort til stæði að setja þær. Ráðherra svaraði því til að málið yrði skoðað. Þjónustan byði upp á marga möguleika en einnig hættur.