RKÍ leggur fram þrjár milljónir vegna hamfara í Bangladess

Rauði kross Íslands sendi í dag þriggja milljóna króna framlag til neyðaraðstoðar í Bangladess vegna fellibyljarins Sidr sem gekk yfir landið á fimmtudag.

Eftir því sem fram kemur í tilkynningu frá Rauða krossinum óskaði Alþjóða Rauða krossinn eftir 213 milljónum íslenskra króna til að aðstoða um 235 þúsund manns á hamfarasvæðunum næstu níu mánuðina. Rúmlega þrjú þúsund manns hafa fundist látnir eftir fellibylinn en óttast er að þegar upp er staðið verði sú tala nokkuð yfir 10.000 manns.

Í tilkynningu Rauða krossins segir að um 42 þúsund sjálfboðaliðar Rauða hálfmánans taki þátt í neyðarvörnum landsins, meðal annars að koma fólki í neyðarskýli í tæka tíð og dreifa nauðþurftum til fórnarlamba hamfaranna. Mikilvægast sé að koma hreinu vatni til þeirra sem hafast við á flóðasvæðunum.

Rauði krossinn bendir á hægt sé að styðja við uppbyggingu eftir hamfarirnar með því að hringja í Söfnunarsímann 907 2020. Við hvert símtal dragast frá 1.200 krónur sem greiðast með næsta símreikningi.