Skila inn athugasemdum vegna rannsóknar á nemendafjölda

Menntamálaráðuneytið hefur fengið athugasemdir frá framhaldsskólunum fimm sem eru til skoðunar vegna skila á upplýsingum um fjölda nemenda sem lokið hafa tilteknum prófum á árunum 2005 og 2006.

Fram kom í Fréttablaðinu í morgun að ráðuneytið hefði sent fimm framhaldsskólum athugasemdir fyrir að veita rangar upplýsingar um fjölda ársnemenda sem ljúka skólaári með prófi.

Í tilkynningu frá ráðuneytinu vegna fréttarinnar segir að skólarnir sem um ræðir séu Iðnskólinn í Reykjavík, Fjölbrautaskólinn í Breiðholti, Flensborgarskólinn í Hafnarfirði, Fjölbrautaskólinn við Ármúla og Menntaskólinn í Kópavogi. Svör hafi borist frá þeim vegna greinargerðar ráðuneytisins og málið sé til athugunar. Ráðuneytið tjái sig ekki frekar um efni þess eða málsmeðferð.