Hraðahindrun skemmd í annað sinn í Þorlákshöfn

Óprúttnir aðilar eða aðili skemmdi um helgina hraðahindrun í Biskupabúðum í Þorlákshöfn.

Fram kemur í dagbók lögreglunnar á Selfossi að starfsmenn sveitarfélagsins Ölfuss hafi í morgun uppgötvað að búið var að skemma hindrunina en þetta er í annað sinn á stuttum tíma sem hraðahindrun er skemmd í bænum.

Lögreglan biður alla þá sem veitt geta upplýsingar um hver þarna var að verki að hafa samband í síma 480-1010. Hún segir hraðahindranir mikilvægar og eingöngu hugsaðar til að veita gangandi og öðrum vegfarendum öryggi vegna þeirra ökumanna sem ekki skilja eða vilja fara eftir þeim reglum sem gilda um umferðina.