Svandísarmáli formlega lokið

Gengið var frá sátt í máli Svandísar Svavarsdóttur, borgarfulltrúa Vinstri - grænna, á hendur Orkuveitu Reykjavíkur í Héraðsdómi Reykjavíkur í morgun.

Í sáttinni felst að Orkuveitan viðurkennir að eigendafundur 3. október, þar sem samruni Reykjavik Energy Invest og Geysis Green Energy var samþykktur, hafi verið ólögmætur. Þá fellur Svandís frá kröfu sinni um að ákvarðanir sem teknar voru á fundinum verði dæmdar ógildar þar sem búið er að draga þær til baka. Orkuveitan greiðir jafnframt málskostnað Svandísar í málinu.

Munnlegur málflutningur vegna frávísunarkröfu Orkuveitunnar í málinu átti að fara fram í morgun en eigendafundur Orkuveitunnar ákvað á föstudag að taka aftur ákvarðandir á hinum umdeilda eigendafundi 3. október varðandi samruna REI og Geysis Green Energy. Þar var jafnframt ákveðið að fela forstjóra Orkuveitunnar að leita sátta í málaferlum Svandísar Svavarsdóttur gegn Orkuveitunni vegna lögmætis fundarins.

Að sögn Ragnars Hall, lögmanns Svandísar í málinu, er því nú formlega lokið. Svandís líti svo á að hún sé búin að ná markmiðum sínum þar sem Orkuveitan samþykki að fundurinn hafi verið ólögmætur.