Boeing þjónusti ekki Loftleiðir vegna Kúbuflugs

Bandarísk stjórnvöld hafa óskað eftir því við Boeing-flugvélaverksmiðjurnar að þær þjónusti ekki þær Boeing-vélar sem Loftleiðir, dótturfélag Icelandair Group, nota til Kúbuflugs vegna viðskiptabanns Bandaríkjanna á Kúbu.

DV hefur eftir Guðjóni Arngrímssyni upplýsingafulltrúa að félagið sé í daglegu sambandi við Boeing vegna málsins en hann vill ekki tjá sig um næstu skref í málinu.

Þá hefur DV eftir Hannesi Hilmarssyni, forstjóra Atlanta, að félagið muni ekki fljúga fyrir kúbanska flugfélagið Cubana að svo stöddu.

Þetta eru mikil umskipti frá því að Loftleiðir og síðan Flugleiðir voru taliln njóta forréttinda til lendingarleyfa í Bandaríkjunum á tímum hernaðarumsvifa Bandaríkjamanna á Íslandi.