Fjórir játa stuld á skotvopnum

Fjórir ungir menn á aldrinum 16 til 20 ára játuðu við yfirheyrslur hjá lögreglunni í Borgarnesi í gær, að hafa í fyrrinótt brotist inn í flugskýli við Húsafell og meðal annars stolið þaðan skotvopnum.

Við innbrotið notuðu þeir traktorsgröfu og gátu með henni brotið upp læstan byssuskáp. Úr honum stálu þeir byssum og skotfærum, sem þeir földu í sumarbústað, sem þeir höfðu á leigu á svæðinu.

Alls voru sex ungmenni handtekinn vegna rannsóknarinnar. Allar byssurnar og skotfærin komu í leitirnar, en töluvert tjón var unnið í flugskýlinu. Ekki liggur fyrir hvað ungmennin hugðust fyrir með skotfærunum.