Tvö hundruð milljóna króna tjón í fjósbruna

200 milljóna króna tjón varð þegar eitt fullkomnasta fjós landsins brann til ösku í gærkvöld ásamt 200 nautgripum. Bruninn er einn sá skelfilegasti sem slökkviðismenn hafa glímt við.

Slökkvið Dalvíkurbyggðar og Akureyrar voru kölluð út um fimmleytið í gær að bænum Stærra Árskógi í aftakaveðri. Þar hafði blossað upp eldur í fjósi í aftakaveðri, stormi og snjókomu.

Á skömmum tíma brann allt sem brunnið gat, fjós, hlaða og önnur útihús. Þar stóð eitt fullkomnasta fjós landsins í gær með 230 gripum en nú eru bara 30 nautgripir á lífi sem brutust út í sortann. Slökkviliðsmenn segja brunann einn þann versta sem sögur fara af.

Bóndinn á bænum gekk nærri sér við björgunarstörf í gær en engin slys yrðu á fólki. Það var þungt yfir ábúendum og frændfólki í dag enda skelfileg sjón að sjá natugripina út um allt. Og tjónið er gríðarlegt. Óli Jón Hermannsson, mágur bóndans, segir það nema allt að 200 milljónum króna.

Rafmagnsbilun í mjólkurhúsi er talin orsök brunans en róbotar sem stýrðu mjöltum í fjósinu létu vita af biluninni. Dagurinn í dag hefði að öllu venjulegu orðið gleðilegur tímamótadagur hjá ábúendum því ár er frá því að fjósið var tekið í gagnið.