Einn versti skaði á sveitabæ hérlendis

Tilkynnt var um eldinn um fimmleytið síðdegis. Slökkvilið og lögregla frá Dalvík og Akureyri fóru á staðinn en mikill eldur var í fjósinu þegar að var komið og slökkvistarf erfitt vegna veðurhams. Um sexleytið var fjósið brunnið og eldurinn kominn í hlöðu. Um 230 nautgripir voru í útihúsunum, bæði mjólkurkýr og geldneyti, en um þrjátíu skepnur sluppu undan bálinu og hlupu út í náttmyrkrið. Tekist hefur að ná þeim aftur og verða þær hýstar á næsta bæ. Íbúðarhúsið stendur afsíðis og var ekki í hættu. Slökkvilið var enn að störfum í morgun en eldur gaus af og til upp í brunarústunum í alla nótt. Fjárhagslegur skaði er metinn töluvert á annað hundrað miljóna króna en þetta er eitt versta tjón sem orðið hefur á sveitabæ hérlendis.