Brúðkaup aldarinnar

Tvær af ríkustu fjölskyldum landsins tengdust saman í dag þegar Jón Ásgeir Jóhannesson, sonur Jóhannesar í Bónus og Ingibjörg Pálmadóttir, dóttir Pálma í Hagkaupi, gengu í það heilaga.

Brúðkaupið fór fram í Fríkirkjunni og hófst athöfnin klukkan 17.30. Það var séra Hjörtur Magni sem gaf skötuhjúin saman og sameinaði þannig Bónus- og Hagkaupsfjölskyldurnar í heilögu hjónabandi. Í úttekt sem tímaritið Sirkus gerði í sumar voru hreinar eignir Jóns Ásgeir metnar á 105 milljarða króna. Ingibjörg var í sömu úttekt metin á 30 milljarða og saman eru þau hjón því um 135 milljarða króna virði.

Fjöldi fólks var viðstatt athöfnina og var Fríkirkjan orðin troðfull um klukkan fimm í dag. Þar mátti sjá Björgólf Guðmundsson og fleiri.

Brúðhjónin óku svo frá kirkjunni í veisluna í Rolls Roys bifreið Jóns Ásgeirs sem hann lét flytja sérstaklega til landsins frá Englandi í tilefni dagsins.

Um 300 manns var boðið í veisluna sem haldin er í Hafnarhúsinu. Búið er að reisa nokkurs konar viðbyggingu svo það væsi ekki um gestina.

Gera má ráð fyrir því að allir helstu auðmenn landsins séu boðnir til veislunnar. Mikil leynd hefur hvílt yfir henni og þegar fréttastofa bað um að fá að mynda undirbúninginn í dag var henni vísað frá. Ekki fékkst heldur leyfi til að mynda veitingarnar en ljóst er að veislan verður ein sú allra veglegasta sem haldin hefur verið á Íslandi. Þá er sterkur orðrómur uppi um að sjálfur Georg Michael syngi fyrir veislugesti.