OR tekur í notkun nýja aflvél

Orkuveita Reykjavíkur tekur í dag formlega í notkun nýja aflvél í Hellisheiðarvirkjun, sem mun spara fyrirtækinu 700 milljónir króna árlega í raforkukaupum fyrir almennan markað, samkvæmt upplýsingum frá Orkuveitunni.

Vélin er af nýrri gerð, svokölluð lágþrýstivél, og nýtir skiljuvatn sem ekki er hægt að nýta í háþrýstihverflunum tveimur, sem þegar hafa verið teknar í notkun í virkjuninni. Þetta er fyrsta vél þessarar gerðar sem tekin er í notkun í íslenskri jarðhitanýtingu.

Samhliða verður nýtt kynningarrými Hellisheiðarvirkjunar opnað en það verður opið ferðamönnum alla daga milli klukkan 9 og 18.