Síldinni mokað upp úr Grundarfirði

Síldarævintýrið á Grundarfirði heldur áfram og nú sem aldrei fyrr. Nótaveiðiskipið Guðmundur VE náði í gær 2000 tonna síldarkasti rétt fyrir utan byggðarlagið.

Á fréttavefnum Eyjar.net kemur fram að þetta síldarkast skipverjanna á Guðmundi sé líklega það stærsta á þessari vertíð. Á bloggsíðum sjómanna má lesa að Hákon EA hafi verið bíða eftir því að fá að dæla hluta af þessu 2000 tonna kasti yfir til sín.

Þá náði Júpíter nokkru áður 1500 tonna kasti í Grundarfirði, en þessar myndir tók sjómaður um borð í Júpiter einmitt af því kasti.

Skipin veiða síldina skammt undan landi. Kap Ve kastaði einnig á svipuðum stað og Guðmundur í gær og fékk yfir 1000 tonn. Háseti um borð í Guðmundi kveðst hreint ekki skilja hvað allt þetta magn af síld sé að gera þarna inni á Grundarfirði því ekki séu þetta beint venjuleg síldarmið.