Vinur McCann hjónanna þjakaður af sektarkennd

Vinur McCann hjónanna hefur nú stigið fram og segist hafa séð þegar Madelaine litla McCann var numin á brott. Hún segist nú þjökuð af sektarkennd fyrir að hafa ekki aðhafst neitt í málinu.

Konan, Jane Tanner, er ein þeirra sem fór út að borða með McCann hjónunum kvöldið sem Maddie hvarf. Alls voru níu vinir og kunningjar sem borðuðu saman þetta kvöld og skiptust allir á að fara upp á hótel og aðgæta hvort ekki væri í lagi með börnin sem skilin voru eftir á herbergjum sínum.

Tanner segir að skömmu eftir að Gerry McCann hafi farið að breiða yfir Maddie litlu í síðasta skiptið hafi hún sjálf farið upp á herbergi til að gæta að dóttur sinni. Það var þá sem hún sá mann halda á stúlkubarni.

"Ég gerði mér ekki strax grein fyrir því að þetta var Maddie, sem maðurinn hélt á. Ég vissi að Gerry var nýbúinn að breiða yfir hana og taldi það því óhugsandi að þetta gæti verið hún. Það var ekki fyrr en síðar, þegar hinn hræðilegi sannleikur kom í ljós, að ég áttaði mig á hvað það var sem ég sá," segir Tanner.

Hún lýsir manninum sem hafði Maddie á brott sem hávöxnum með svart krullað hár.