Eldur logar um alla sveit og andstaðan hörð í Flóa

Sveitarstjórn Flóahrepps hefur hvorki látið Landsvirkjun hóta sér né kúga til að setja Urriðafossvirkjun á aðalskipulag, segir sveitarstjóri hreppsins. Talsmaður Sólar í Flóa segir eld loga um alla sveit vegna ákvörðunar sveitarstjórnar og andstaðan verði harðari en nokkru sinni fyrr.

Í fyrradag samþykkti sveitarstjórn Flóahrepps tillögu með Urriðafossvirkjun á aðalskipulagi. Fyrr í sumar hætti sveitarstjórnin við að hafa Urriðafossvirkjun í skipulaginu og talið var að ávinningur af virkjun væri ekki nægur.

Landsvirkjun boðaði þá til fundar með sveitastjórn og skömmu síðar setti hún fram tvær tillögur að aðalskipulagi, með virkjun annars vegar og án virkjunar hins vegar. Sú ákvörðun var harðlega gagnrýnd og talsmenn andstæðinga Urriðafossvirkjunar sögðu Landsvirkjun hafa bæði hótað og mútað sveitastjórn Flóahrepps til að skipta um skoðun.

Steingrímur J. Sigfússon formaður vinstri grænna var einnig harðorður á Alþingi í gær vegna ákvörðunar sveitarstjórnar og sagði ljóst að Landsvirkjun hefði mætt á staðinn með seðlabúntið í annarri og byssuna í hinni. Aðalsteinn Sveinsson oddviti Flóahrepps vísar því alfarið á bug og segir ummæli Steingríms móðgandi. Margrét Sigurðardóttir sveitarstjóri Flóahrepps segir að sveitarstjórnin láti Landsvirkjun hvorki hóta sér né kúga til að setja Urriðafossvirkjun á aðalskipulag.

Halldóra Gunnarsdóttir talsmaður Sólar í Flóa segir ákvörðun sveitastjórnar valda miklum vonbrigðum. Þótt sveitarstjórnin hafi gefist upp ætli Sól í Flóa ekki að gefast upp. Eldur logi um alla sveit og andstaðan verði harðari en nokkru sinni fyrr.

Með urriðafossvirkjun inn á aðalskipulagi hyggst Landsvirkjun meðal annars bæta farsímasamband á svæðinu, malbika um 17 kílómetra vegarkafla í hreppnum og kosta aðlögn fyrir vatnsveitu sveitarfélagsins.

Lónið verður staðsett nokkrum kílómetrum fyrir ofan Urriðafoss og verður hæð þess 50 metrar yfir sjávarmáli.