Einkaleyfi Háskólans til útgáfu almanaks afnumið

Menntamálaráðherra hyggst leggja fram frumvarp á Alþingi um að einkaleyfi Háskóla Íslands til útgáfu almanaks verði afnumið. Ráðherra kynnti frumvarpið á ríkisstjórnarfundi í morgun.

Fram kemur í greinargerð vegna frumvarpsins að einkaleyfið sé lagt niður eftir ábendingar frá Eftirlitsstofnun EFTA og hefur málið verði kynnt Háskóla Íslands sem tekur undir sjónarmiðin.

Frumvarpið kveður hins vegar ekki á um að Háskólinn skuli hætta að gefa út almanakið en miðað er við að lögin um afnám á einkaleyfi Háskólans taki gildi 1. janúar 2009.

Almanak Háskóla Íslands á sér sögu sem rekja má allt aftur til ársins 1684 þegar Kaupmannahafnarháskóli hafði einkarétt til útgáfu almanaka í Danmörku. Þegar Ísland var viðurkennt fullvalda ríki 1918 féll þessi einkaréttur niður.

Lögin sem fella á úr gildi kveða á um að Háskóli Íslands hafi einkarétt til að gefa út og selja eða afhenda með öðrum hætti almanök og dagatöl. Í lögunum er ennfremur fjallað um útreikning almanaksins.

Bent er á að um 900 þúsund eintök af almanökum og dagatölum af ýmsum gerðum muni vera gefin út hér á landi og flest þeirra sæki upplýsingar í Almanak háskólans, sem kalla megi grundvallarrit almanaksútgáfu á þessu sviði.

Almanakið mun nú vera gefið út í fjögur þúsund eintökum og hafa tekjur háskólans af því verið áætlaðar um 1,7 milljónir króna. Verði frumvarpið að lögum munu þær falla niður í fjárlögum 2009.