Sala á kindakjöti minnkar milli ára

Sala á kindakjöti dróst saman um nærri fimm prósent á þriðja ársfjórðungi eftir því sem segir á vef Landssambands sauðfjárbænda.

Þar segir einnig að 804 tonn af kindakjöti hafi selst í síðasta mánuði en það er 3,6 prósentum minna en í sama mánuði í fyrra. Framleiðsla á kindakjöti reyndist hins vegar meiri í október í ár en í sama mánuði í fyrra eða rúmlega 4.700 tonn.

Markaðshlutdeild kindakjöts á kjötmarkaði hér á landi á síðustu tólf mánuðum reyndist 28,5 prósent en það er eilítið minni hlutdeild en alifuglakjöts sem reyndist tæp 30 prósent.