Svandísarmálið úr sögunni og samrunanum hafnað

Samþykkt var á aukafundi í borgarráði í dag að fara að tillögum stjórnar OR að hafna samruna REI og Geysir Green Energy. Jafnframt var borin upp tillaga um að leita sátta í Svandísarmálinu svokallaða en Svandís Svavarsdóttir borgarfulltrúi VG hefur höfðað mál sem skera átti úr um lögmæti eigendafundarins hjá OR þegar sameining fyrirtækjanna var samþykkt.

Sáttatillagan, sem gengur út á að falla frá málshöfðun, var samþykkt en Sjálfstæðisflokkurinn sat hjá við þá atkvæðargreiðslu. Vilhjálmur Vilhjálmsson, oddviti flokksins sagði í samtali við Stöð 2 að eðlilegast væri að málið fengi að renna sitt skeið á enda í dómskerfinu.

Dagur B. Eggertsson, borgastjóri, sagði eftir fundinn að hann hefði fengið heimild til þess að ræða við Hitaveitu Suðurnesja og aðra aðila sem koma að orkuöflun í landinu og eiga þær viðræður að miða að því að tryggja yfirráð almennings yfir orkulindum landsins.