Gunnari Wathne sleppt úr haldi en verður í farbanni

Hæstiréttur í Nýju-Delí hefur farið fram á það að Gunnari Stefáni Wathne, Íslendingi sem bandarísk stjórnvöld hafa leitað vegna gruns um peningaþvætti, verði sleppt úr gæsluvarðhaldi.

Hins vegar verður Gunnar í farbanni og og þarf hann að láta vita af sér á lögreglustöð í borginni tvisvar í viku. Fréttavefurinn The Hindu greinir frá þessu.

Gunnar var handtekinn á flugvelli í Nýju-Delí í lok september en bandarísk stjórnvöld hafa leitað hans í fjögur ár. Hann er grunaður um að hafa þvættað þrjár milljónir dollara, jafnvirði um 180 milljóna króna, fyrir Bandaríkjamanninn William Pikard sem sakfelldur var árið 2003 fyrir framleiðslu á LSD.

Eftir því sem indverskir miðlar greindu frá þegar Gunnar var handtekinn fór peningaþvættið þannig fram að Pikard tók við rannsóknarstöðu hjá Háskólanum í Kaliforníu í Los Angeles. Hann fékk svo rannsóknir sínar fjármagnaðar í gegnum rússneskan starfsbróður sinn við háskólann.

Fjármunirnir munu hafa komið frá Gunnari en þeir voru upprunalega í eigu Pikards og höfðu verið þvættaðir í fyrirtækjum sem Gunnar stjórnaði í Eistlandi og á fleiri stöðum á árunum 1998-2005.