Enn frestað að afgreiða umsóknir nektardansstaða um rekstarleyfi

Afgreiðsla á tillögu að umsögn borgarráðs um rekstarleyfi til handa nektardansstöðunum Bóhem, Club Óðal og Vegas var frestað enn og aftur á fundi borgarráðs í dag.

Á fundinum var lögð fram umsögn Rannsóknarstofu í kvenna- og kynjafræðum um málið og sömuleiðis lögð fram andmælabréf eigenda nektardansstaðanna og lögmanna þeirra.

Borgarráð ákvað fyrir um þremur vikum að leggjast gegn því að heimila nektardans á veitingahúsunum þremur en jákvæð umsögn frá öllum umsagnaraðilum er forsenda þess að hægt sé að veita undanþágu til nektardans, sem annars er bannaður með lögum.

Borgarráð hafði veitt umsögn um staðina í lok ágúst þar sem ekki var lagst gegn því að að þeir fengju rekstrarleyfi en vísað var til þess að lögreglustjóri höfuðborgarsvæðisins hefði synjað Goldfinger í Kópavogi um leyfi til nektardans. Umsögn borgarráðs var hins vegar svo óskýr að lögreglustjóri fór fram á nýja umsögn þar sem skýr afstaða borgaryfirvalda kæmi fram.