Orka til álvers í Helguvík gæti verið í uppnámi

Óvíst er með orku til álvers í Helguvík eftir að Grindvíkingar ákváðu að nýta orku í bæjarlandinu í heimabyggð. Vogar, Hafnarfjörður og Grindavík ætla að stofna félag til að tryggja að orkulindir innan sveitarfélaganna verði alfarið í þeirra eigu.

Talsmenn Hitaveitu Suðurnesja segja að fyrirtækið hafi rannsóknarleyfi á þeim svæðum á Reykjanesi þar sem helstu orkulindir sveitarfélaganna þriggja eru. Spurningar hafa vaknað hvort sveitarfélögin þrjú séu með þessu að stofna nýtt orkufyrirtæki á svæðinu. Lúðvík Geirsson, bæjarstjóri í Hafnarfirði segir að svo sé ekki. Markmiðið sé að fyrirtækin sameinist um sameiginlega hagsmuni varðandi orkulindir sínar.

Framtíðarorkulindir í sveitarfélögnum þremur eru við Trölladyngju, við Sandfell og í Krísuvík. Ætla má að væntanlegir kaupendur orku af því svæði þurfi að tilgreina hvar þeir hyggist nýta orku auk þess sem liggja þarf fyrir hvernig framkvæmt verður í tengslum við virkjanir.

Grindvíkingar segjast standa frammi fyrir breyttum aðstæðum vegna samdráttar í þorskkvóta og því sé áherslan á orkumálin í brennidepli. Ólafur Örn Ólafsson, bæjarstjóri í Grindavík, segir að orka sem verði virkjuð í landi Grindavíkur verði notuð þar.

Sú fullyrðing gæti gefið í skyn að þurrð verði á orku til starfsemi væntanlegs álvers í Helguvík, sem er í landi Reykjanesbæjar. Árni Sigfússon bæjarstjóri þar sagði í samtali við Stöð 2 að ekkert benti til þess að álver þar yrði í uppnámi. Júlíus Jónsson, forstjóri Hitaveitu Suðurnesja, sagði að stærstur hluti þeirra orku sem fari til álversins í Helguvík komi úr landi Reykjanesbæjar í fyrsta áfanga. Hluti komi vissulega úr Svartsengi sem er í landi Grindavíkur. Fundur sé með Grindvíkingum á á þriðjudag og þá skýrist þessi mál frekar.