Bæjarstjóri bíður ekki lengur eftir ríkinu

Viðræður Kópavogs og stjórnvalda um uppbyggingu hjúkrunaríbúða í Kópavogi hafa staðið frá árinu 2003 en lítið hefur miðað. Gunnar Birgisson bæjarstjóri segist vera búinn að missa þolinmæðina gagnvart ríkinu og vill hefja framkvæmdir svo fljótt sem auðið er, með eða án þátttöku ríkisins.

,,Samningaviðræðurnar hafa tekið á fimmta ár og ekki liggur enn fyrir niðurstaða í málinu þannig að við sjáum okkur knúinn til þess að fara af stað í þessa uppbyggingu, óháð því hvort íslenska ríkið takið þátt í henni eða ekki. Það verður bara að koma í ljós," segir Gunnar í samtali við Kópavogspóstinn sem fjallar um málið í nýjasta tölublaði. Gunnar tekur fram að þörfin fyrir slíka þjónustu sé mikil og í raun ekki hægt að bíða lengur.

Aðspurður um hvað valdi þessari töf hjá ríkinu segir Gunnar í samtali sínu við Kópavogspóstinn: ,,Nefndu það bara! Meðal annars á rekstrarforminu, hversu stórar íbúðirnar eigi að vera, fjárfestingunni sjálfri og fleira og fleira. Þetta virðist engan endi ætla að taka. Við höfum bara ekki tíma né þolinmæði til að bíða lengur og munum því hefja framkvæmdir á næsta ári og gerum ráð fyrir að uppbyggingunni ljúki á næstu fjórum árum,"

Við Boðaþing ætlar Kópavogsbær að byggja 88 hjúkrunarrými og 106 þjónustuíbúðir auk félags- og þjónustumiðstöðvar. Fyrir utan uppbygginguna sem bærinn stendur fyrir í Boðaþingi, með eða án þátttöku ríkisins, munu verktakar byggja 170 íbúðir í götunni fyrir 60 ára og eldri sem fara á almennan markað en íbúar þeirra hafa einnig aðgang að félags- og þjónustumiðstöðinni. Gunnar reiknar með að hægt verði að flytja inn í fyrstu þjónustuíbúðirnar á fyrri hluta ársins 2009.