Segir sveitastjórn Flóahrepps hafa bakkað undan ægivaldi Landsvirkjunar

Sveitarstjórn Flóahrepps lét undan þrýstingi frá Landsvirkjun þegar hún ákvað að breyta aðalskipulagi fyrrum Villingaholtshrepps til að koma fyrir Urriðafossvirkjun. Þetta kom fram í máli Guðfríðar Lilju Grétarsdóttur, varaþingmanns Vinstri grænna, í umræðu um störf þingsins á Alþingi í dag. Steingrímur J. Sigfússon, formaður Vinstri grænna, sagði Landsvirkjun fara fram með ofríki.

Guðfríður Lilja Grétarsdóttir sagði ljóst að lýðræðislegir kjörnir fulltrúar í sveitarstjórn Flóahrepps hafi látið undan ægivaldi Landsvirkjunar. Gagnrýndi hún ennfremur Samfylkinguna fyrir að beita sér ekki í málinu og talaði í því samhengi um skerandi þögn helstu ráðherra flokksins.

Steingrímur J. Sigfússon, formaður Vinstri grænna, sakaði Landsvirkjun um að beita sveitarfélög og landeigendur þrýstingi og fara fram með ofríki.

Bjarni Harðarson, þingmaður Framsóknarflokksins, og Illugi Gunnarsson, þingmaður Sjálfstæðisflokksins, sögðu ásakanir Vinstri grænna um að sveitarstjórn hefði látið undan þrýstingi í málinu vera ámælisverðar.

Sveitarstjórn Flóahrepps ákvað á fundi sínum í gær að auglýsa tillögu að aðalskipulagi fyrrum Villingaholtshrepps þar sem gert er ráð fyrir Urriðafossvirkjun. Þetta er þvert á það sem sveitarstjórnin ákvað í sumar en í drögum að aðalskipulagi sem þá voru kynnt var var ekki gert ráð fyrir virkjuninni.