Formaður viðskiptanefndar fagnar rannsókn Samkeppniseftirlitsins

Ágúst Ólafur Ágústsson, formaður viðskiptanefndar Alþingis, fagnar því að Samkeppniseftirlitið skoði meint samráð matvöruverslana. Eins og greint hefur verið frá í dag gerði Samkeppniseftirlitið húsleit hjá Bónus og Krónunni í morgun.

„Það hlýtur að vera mikilvægt fyrir alla aðila að óvissunni um þetta sé eytt. Því ásakanir á hendur fyrirtækjunum um samráð eru auðvitað mjög alvarlegar," segir Ágúst Ólafur og bendir á að fyrirtækin hafi sjálf fagnað rannsókninni.

„Það er greinilegt að Samkeppniseftirlitið er að sinna hlutverki sínu og samkeppnislög eru mjög skýr varðandi það að samráð er ólöglegt," bætir Ágúst við. „En svo er auðvitað alveg óljóst hvað kemur út úr þessari rannsókn. Það eru allir saklausir uns sekt er sönnuð," segir Ágúst að lokum.