Alþingi þarf að vanda sig betur

Alþingi þarf að breyta vinnulagi og vanda betur til verka við gerð nýrra laga. Þetta kom fram í máli Ágústs Ólafs Ágústssonar, þingmanns Samfylkingarinnar, á Alþingi í dag.

Fjallað var um skýrslu umboðsmanns Alþingis fyrir árið 2006 á Alþingi í morgun. Í skýrslunni kemur meðal annars fram að hlutfall gallaðra laga sé óvenju hátt hér á landi miðað við hin Norðurlöndin.

Ágúst sagði ljóst að Alþingi væri að samþykkja alltof mörg lög með alltof miklum hraða. Taldi hann nauðsynlegt að breyta vinnulagi Alþingis. Ennfremur vildi hann auka samráð með hagsmunaaðilum við gerð frumvarpa þannig að þeir kæmu fyrr inn í vinnuferlið.